प्रतिनिधी : मिलन शहा
मीरा-भाईंदर : मराठी भाषेला अभिजात मराठीचा दर्जा मिळाला असला तरी मीरा -भाईंदर महानगरपालिकेतील शासकीय कामकाज हे इंग्रजी भाषेत होत असल्याचे आणि जाणीवपूर्वक मराठी भाषेचा अवमान महानगरपालिका करत असल्याची बातमी एका वृत्तपत्रातून छापण्यात आली होती. या बातमीवर ठोस एक्शन घेत महाराष्ट्र राज्य परिवहन मंत्री तथा धाराशिव जिल्हा पालकमंत्री . प्रताप सरनाईक यांनी आता मीरा -भाईंदर महानगरपालिका आयुक्तांना सूचना देत महानगरपालिकेतून होणारे सर्व प्रशासकीय कामकाज, पत्रव्यवहार, नागरिक सेवा आणि माहिती फलक मराठीतच होणे बंधनकारक असल्याच्या सूचना दिल्या आहेत.
यासंदर्भात बोलताना मंत्री सरनाईक म्हणाले की,
“मराठी ही आपली मायबोली, आपली अस्मिता आणि महाराष्ट्राची ओळख आहे. या भूमीत जन्म घेऊनही आपल्या भाषेला दुय्यम स्थान देणे सहन केले जाणार नाही. मराठी राजभाषेच्या सन्मानासाठी शासन ठाम आहे आणि मीरा-भाईंदर महानगरपालिका आता मराठीच्या अंमलबजावणीत आदर्श ठरेल. नागरिकांना प्रत्येक सेवा मराठीत मिळणे हा त्यांचा हक्क असून शासन त्या हक्कासाठी कटिबद्ध आहे. महाराष्ट्रात मराठीला वावडे नाही आणि आता हेच प्रत्यक्षात उतरवले जाईल. ”
चला आता तरी निवडणूक लक्षात ठेवून मराठी ची आठवण आली,☺️