एसएमएस -प्रतिनिधी -सोमा डे
मुंबई :मालवणी गेट क्रमांक ८ येथील एमएचबी कॉलनी परिसरात गटाराचे काँक्रिटिकरण सुरू असताना रेडी मिक्स काँक्रिट घेऊन आलेल्या मिक्सरचे पुढील चाक अचानक खुल्या गटारात अडकल्याची घटना घडली. या घटनेमुळे तब्बल तीन ते चार तास परिसरातील वाहतुकीसाठी रस्ता पूर्णपणे बंद राहिला.
सकाळी सुमारे ९.३० वाजताच्या सुमारास ही घटना घडली. मिक्सरचे चाक गटारात अडकल्याने परिसरात मोठी वाहतूक कोंडी निर्माण झाली. विशेषतः पादचारी, शाळकरी विद्यार्थी, महिला व ज्येष्ठ नागरिकांना ये-जा करताना मोठ्या अडचणींना सामोरे जावे लागले.
घटनेची माहिती मिळताच दुपारी १ ते १.३० वाजताच्या दरम्यान महानगरपालिकेकडून जेसीबीच्या साहाय्याने मिक्सरला गटारातून बाहेर काढण्यात यश आले. त्यानंतर वाहतूक सुरळीत करण्यात आली, त्यामुळे रहिवाशांना काहीसा दिलासा मिळाला.
मात्र या घटनेमुळे परिसरातील खुल्या गटारांचा प्रश्न पुन्हा एकदा ऐरणीवर आला आहे. योग्य सुरक्षा उपाय न करता सुरू असलेल्या कामांमुळे अशा अपघातांची शक्यता वाढत असून नागरिकांनी याबाबत तीव्र नाराजी व्यक्त केली आहे. प्रशासनाने तातडीने सुरक्षिततेच्या उपाययोजना कराव्यात, अशी मागणी रहिवाशांकडून होत आहे.
