मालाडकरांना वाहतूक समस्यांपासून सुटका मिळणार!!

मुंबई : मालाडमधील नागरिकांसाठी एक आनंदाची बातमी अशी आहे की या वर्षाच्या अखेरीस, ६० फूट रुंदीचा आणि ५५० मीटर लांबीचा एक नवीन रस्ता उपलब्ध होणार आहे, ज्याला शंकर लेन मिसिंग लिंक प्रोजेक्ट असे नाव देण्यात आले आहे. हा नवीन रस्ता मालाड शंकर लाईनला थेट वळनई मेट्रो स्टेशनजवळील मालाड लिंक रोडशी जोडेल.  येथील वाहतूक समस्या कमी करण्यासाठी मनपा पी/नॉर्थ वॉर्डने या प्रकल्पावर वेगाने काम सुरू केले आहे. पी/नॉर्थचे सहाय्यक आयुक्त कुंदन वळवी म्हणाले की, या रस्त्याच्या बांधकामामुळे मालवणी, जन कल्याण नगर आणि लालजी पाडा येथून पश्चिम द्रुतगती महामार्गाकडे जाण्यासाठी पर्यायी मार्ग तयार होईल. या प्रकल्पामुळे मार्वे रोड, मालाड सबवे सारख्या भागांवरील वाहतुकीचा ताणही कमी होईल आणि लोकांना दिलासा मिळेल. तसेच, पावसाळ्यात सापूर पाडा परिसरातील पाणी साचण्याची समस्या बऱ्याच प्रमाणात सुटेल.

         पी/नॉर्थचे कार्यकारी अभियंता मंदार चौधरी यांनी माहिती दिली की हा प्रकल्प तीन टप्प्यात पूर्ण केला जाईल. यासाठी एकूण ३५७ घरे पाडली जाणार आहेत, त्यापैकी आतापर्यंत ११० झोपड्या पाडण्यात आल्या आहेत. उर्वरित कामही वेगाने सुरू आहे. ज्यांच्या झोपड्या काढून टाकण्यात आल्या आहेत त्यांना सेराज गुरियापाडा एसआरए, न्यू लिंक रोड, मालाड (पश्चिम) येथे स्थलांतरित करण्यात आले आहे.

या प्रकल्पाची माहिती देताना, झोन ४ च्या  उपायुक्त डॉ भाग्यश्री कापसेन्नी आश्वासन दिले की हा रस्ता पुढील ३ ते ४ महिन्यांत पूर्णपणे तयार होईल. त्यांची टीम  वेळेपूर्वी हा नवीन रस्ता मिळावा यासाठी खूप प्रयत्न करत आहे.